Երեխաների կոկորդի հիվանդություններ

Վերին շնչուղիների վարակները երեխաների մոտ 3 անգամ ավելի հաճախ են հանդիպում, քան մեծահասակների մոտ: Այսպիսով, կոկորդի ցավը մանկական տարիքում առավել հաճախ ի հայտ եկող խնդիրներից է:

Բացի այդ, երեխաների կոկորդի ցավը սովորաբար ուղեկցվում է հարբուխով կամ քթի փակվածությամբ, աչքերի կարմրությամբ, ինչպես նաև տենդով և թուլության ընդհանուր զգացողությամբ:

Երեխաներն առավել զգայուն են վարակների հանդեպ

• երբ նրանց ընդհանուր առողջական վիճակը բավարար չէ;
• երբ շփվում են այլ երեխաների հետ (մանկապարտեզում կամ դպրոցում);
• երբ բնակության սանիտարա-հիգիենիկ պայմանները չեն համապատասխանում նորմերին:

Վարակի բուժման եղանակը կախված է դրա պատճառից: Վիրուսային կամ թեթև բակտերիալ վարակները կարող են բուժվել անկողնային ռեժիմի պահպանմամբ և դեղամիջոցներով, որոնք վերացնում են կոկորդի ցավի պատճառները և թեթևացնում են դրա ախտանշանները:

Ծանր բակտերիալ վարակների դեպքում անհրաժեշտ է խորհրդակցել բժշկի հետ, որը, հավանական է, կնշանակի համակարգային բուժում հակաբիոտիկներով:

Օգտակար կարող են լինել նաև հետևյալ միջոցները.

• հազի թեթևացման համար նախատեսված դեղամիջոցներ
• քթի լորձաթաղանթը խոնավացնող դեղամիջոցներ
• քթից արտազատումների քանակությունը նվազեցնող դեղամիջոցներ
• ջերմիջեցնող դեղամիջոցներ

Բժշկի խորհրդատվությունը անհրաժեշտ է, եթե

• կոկորդի բորբոքումն ու ցավը հանդիսանում են միակ ախտանշանները և տևում են ավելի քան 48 ժամ
• կոկորդի բորբոքումն ու ցավն ուղեկցվում են այլ ախտանշաններով, որոնք չեն անհետանում ավելի քան 5 օր
• մարմնի բարձր ջերմությունը պահպանվում է 3 օրից ավել
• առողջական վիճակը վատանում է
• ի հայտ են գալիս շնչառական խանգարումներ
• դժվարություններ են առաջանում հեղուկներ կամ թուք կուլ տալիս
• օրգանիզմը ջրազրկվում է
• երեխան շփվել է սուր ֆարինգիտով հիվանդի հետ
• կոկորդի բորբոքումը ուղեկցվում է ցավով՝ ականջի կամ քթի հարակից խոռոչներում
• հայտնվում է ցան
• երեխայի տարիքը չի գերազանցում 2 տարեկանը:

Կարևոր է

Կոկորդի ցավի պատճառով երեխաները հաճախ հրաժարվում են ուտելուց և խմելուց, ինչը կարող է բերել ջրազրկման: Ահա թե ինչու է կարևոր հնարավորինս շուտ կանգնեցնել ցավը: