Ինչ՞ն է առաջացնում տհաճ ախտանշաններ:

Գրգռվածությունը, կարմրությունը, կուլ տալու դժվարությունը և վերջապես կոկորդի ցավը – դրանք այն բոլոր ախտանշաններն են, որոնցից երեխան կարող է բողոքել: Տհաճ ախտանշանների առաջացման  պատճառները տարբեր են, փորձենք նշել ամենատարածվածները:

10 երեխաներից 9-ի մոտ կոկորդի ցավի պատճառը սովորական մրսածությունն է՝ սուր շնչառական վիրուսային վարակը։ Այսինքն ցավը պայմանավորված է վիրուսով։

Գիտե՞ք արդյոք

Կոկորդի քորը, այրոցի զգացումը և ցավը կարող է առաջացնել… չոր օդը! Շատ հաճախ դա տեղի է ունենում բնակարանների ջեռուցման սեզոնի ժամանակ, երբ ջեռուցման մարտկոցները շատ են տաքացնում օդը և սենյակում խոնավությունը նվազում է: Օդի խոնավացուցիչը, որը դուք կարող եք գնել կամ պատրաստել ինքներդ, կարող է օգնել կանխել այս իրավիճակը:

Հակաբիոտիկներ – շատ դեպքերում խնդրի լուծում չեն

Այստեղ կարևոր է հիշել, որ հակաբիոտիկները անարդյունավետ են վիրուսային վարակի դեպքում, և չպետք է դրանք ինքնուրույն ընդունել՝ առանց բժշկի նշանակման: Սուր շնչառական վարակի դեպքում կօգնեն առատ, տաք (ոչ եռման) հեղուկները, քունը և հանգիստը։ Ավելի լավ է ընտրել փափուկ բնույթի սնունդ, որը չի վնասի գրգռված կոկորդը, կլինի հարուստ  վիտամիններով և հանքանյութերով։ Սնունդը ևս չպետք է շատ տաք լինի։ Ցավն ու այտուցը թեթևացնելու համար կարող եք օգտագործել առանց դեղատոմսի դեղորայք:

Տարբեր տեսակի վարակներ

Եթե ​​կոկորդի ցավը ուղեկցվում է բարձր ջերմությամբ և թուլությամբ, ապա պատճառ կարող է հանդիսանալ ստրեպտոկոկային բակտերիան, որը առաջացնում է անգինա: Ավելի հաճախ անգինայով հիվանդանում են  5-15 տարեկան երեխաները: Անգինայի հավանական ախտանշաններից մեկը նշագեղձերի վրա սպիտակ նստվածքային կղզիների առաջացումն է , որոնք տեսանելի են հետազոտության ժամանակ: Նման իրավիճակում պետք է դիմել բժշկի, քանի որ անհրաժեշտ է հակաբիոտիկային թերապիա և բժշկի դեղատոմսի խստիվ պահպանում, քանի որ անգինան կարող է առաջացնել տարբեր բարդություններ:

Գրիպ

Գրիպը վիրուսային հիվանդություն է, որն առաջին հերթին ազդում է շնչառական համակարգի վրա՝ քիթ, կոկորդ, թոքեր:Որո՞նք են գրիպի ամենատարածված ախտանշանները: Բարձր ջերմություն, մկանային ցավ, դող և քրտնարտադրություն, գլխացավ, կայուն չոր ​​հազ, շնչահեղձություն, հոգնածություն և թուլություն, քիթի փակվածություն, աչքերի ցավոտ արձագանք լույսի նկատմամբ, փսխում և փորլուծություն, որն ավելի հաճախ հանդիպում է երեխաների մոտ, քան մեծահասակների, և իհարկե, կոկորդի ցավ։ Բուժումը սովորաբար սիմպտոմատիկ է:

COVID-19

COVID-19-ը երեխաների մոտ ընթանում է  ավելի մեղմ, քան մեծահասակների մոտ։ Միևնույն ժամանակ, այս հիվանդության ախտանշաններից հարկ է նշել կոկորդի ցավը, ջերմությունը, թուլությունը, չոր հազը և շնչարգելությունը։ Եթե ​​կասկածում եք, որ երեխայի մոտ հիվանդությունը «covid»-ային բնույթի է (օրինակ՝ կան հիվանդության հաստատված դեպքեր ընտանիքում կամ երեխայի հետ շփվող մարդկանց շրջանում), անհապաղ դիմեք մանկաբույժին և հետևեք նրա խորհուրդներին։

Մոնոնուկլեոզ

Մոնոնուկլեոզը հիվանդություն է, որն պայմանավորված է Էպշտեին-Բարրի վիրուսով: Վարակիչ մոնոնուկլեոզը կոչվում է նաև «համբույրի հիվանդություն», քանի որ վիրուսը փոխանցվում է թքի միջոցով: Բայց իրականում համբուրվելը պարտադիր չէ, բավական է խմել վիրուսակիր հիվանդի  հետ մեկ բաժակից կամ շշից։ Ինկուբացիոն շրջանը տևում է չորսից վեց շաբաթ, բայց երեխաների մոտ կարող է  ավելի կարճ տևել: Հիվանդության ախտանշաններն ավելի հաճախ արտահայտվում են  դեռահասների մոտ։ Երեխաների մոտ հիվանդությունը կարող է աննշան ընթանալ: Ամենից հաճախ մոնոնուկլեոզով հիվանդը գանգատնվում է հոգնածությունից, բարձր ջերմությունից և գլխացավից: Հետազոտության ժամանակ բժիշկը նկատում է պարանոցի և թևատակերի ավշային հանգույցների մեծացում, մաշկի ցան: Եվ այստեղ կարևոր է նշել կոկորդի ցավի մասին. այն կարող է սխալմամբ ախտորոշվել որպես ստրեպտոկոկային անգինա, որը չի անհետանում հակաբիոտիկային բուժումից հետո: Ախտորոշումը կատարվում է հիվանդի արյան մեջ անտիգենների հայտնաբերումից  հետո։

Լարինգիտ

Եթե ​​խոսքը կոկորդի ցավի մասին է, ապա հարկ է նշել լարինգիտը։ Սա կոկորդում ձայնալարերի բորբոքումն ու այտուցումն է։ Պատճառը ինչպես և  վերին շնչուղիների այլ հիվանդությունների դեպքում՝ հիմնականում վիրուսներն ու բակտերիաներն են։ Ձայնալարերի բորբոքում կարող է առաջանալ նաև ցրտահարման ժամանակ, բերանով սառը կամ տաք չոր օդի ներշնչմամբ, փոշու բարձր պարունակությամբ օդ շնչելիս, կոկորդի գերլարումից (օրինակ՝ բղավելիս): Ամենից հաճախ լարինգիտի դեպքում հանդիպում է  կոկորդի ցավի, չորության և քորի զգացում, ձայնը դառնում է խռպոտ, իսկ երբեմն էլ ժամանակավորապես անհետանում է: Իհարկե, կարող է  նաև լինել ցավոտ զգացողություններ, որոնք առաջանում են լորձաթաղանթի այտուցվածությունից: Բուժումն ուղղված է հիվանդության պատճառի վերացմանը (հիվանդության ինֆեկցիոն բնույթի ժամանակ),  բորբոքումը, ցավն ու անհանգստությունը վերացնելու, ինչպես նաև ձայնը վերականգնելու համար։

Եր՞բ է հարկավոր դիմել բժշկի

Անհրաժեշտ է շտապ դիմել բժշկի, եթե  բացի կոկորդի ցավից երեխան ունի.

• 3 օրից ավելի բարձր մարմնի ջերմաստիճան
• Երեխան ջրազրկված է (սակավ թքարտադրություն, սակավ մեզի արտահոսք)
• Դժվարացած շնչառություն
• Բացի կոկորդից, ցավ կա ականջներում կամ քթի շրջակայքում
• Երեխան չի կարողանում հեղուկ կամ թուք կուլ տալ:
• Կոկորդի ցավը, որը տևում է ավելի քան 48 ժամ, ուժեղանում է կամ միակ ախտանշանն է
• Առողջական վիճակը վատթարանում է։

Անհետաձգելի բժշկական օգնություն պահանջող իրավիճակներից էվերին շնչուղիներում օտար մարմնի առկայությունը: Օրինակ՝ երեխան առանց նկատելու ձուկ է ուտում և ոսկոր կուլ տալիս։ Այն կարող է կպչել կոկորդի պատին՝ առաջացնելով ցավ, այտուց և գրգռում։ Եթե ​​կասկածում եք, որ կոկորդի ցավի պատճառը օտար մարմինն է, երբեք մի փորձեք ինքներդ հեռացնել այն կամ այն ավելի խորը մղել  ավելի կոշտ սննդով:

Անհապաղ դիմեք բժշկի։

Իհարկե, կոկորդի ցավի պատճառները շատ են տարբեր: Ամփոփելով, երեխաների մոտ կոկորդի ցավը առավել հաճախ կարող է առաջանալ վիրուսների կամ բակտերիաների պատճառով: Բուժումը սիմպտոմատիկ է՝ ուղղված  ցավը և բորբոքումը թեթևացնելուն։ Բայց եթե կասկածում եք կամ երեխայի  ինքնազգացողությունը ձեզ անհանգստացնում է, ապա անմիջապես դիմեք բժշկի։